भुवन के सी। प्यूठान — आरम्भ चौतारी लघुवित्त वित्तीय संस्था बाग्दुला शाखाले सञ्चालन गरेको १ दिने बाख्रा तथा भैंसी पालन तालिम आइतबार सफलतापूर्वक सम्पन्न भएको छ। स्थानीय महिला तथा सदस्यहरूलाई आर्थिक रूपमा सशक्त बनाउने, आय–आर्जनका अवसर विस्तार गर्ने र श्रम–सीप विकास गर्ने लक्ष्यका साथ आयोजित तालिमले सहभागीहरूमा नयाँ प्रेरणा र व्यावहारिक ज्ञान थपिदिएको छ।
कार्यक्रमको उद्घाटन प्रमुख अतिथि नेत्रबहादुर केसी (प्यूठान नगरपालिका–०७) ले गर्नुभएको थियो। उद्घाटन समारोहमा उहाँले पशुपालन क्षेत्र ग्रामीण अर्थतन्त्रको प्रमुख आधार भएकाले महिलाहरूले सीपयुक्त रूपमा यो पेशा अपनाएमा जीवनस्तरमा उल्लेखनीय सुधार आउन सक्ने बताउनुभयो।
कार्यक्रमको अध्यक्षता सुलिचौर स्टेशन म्यानेजर राजु कवरले गर्नुभएको थियो भने विशिष्ट अतिथि प्रहरी वरिष्ठ नायब निरीक्षक चन्द्रबहादुर घर्ति मगर, अतिथि समाजसेवी शिवबहादुर पाण्डे लगायतको उपस्थिति रहेको थियो। कार्यक्रमको सञ्चालन केशब कुमालले गर्नुभएको थियो भने स्वागत मन्तव्य शाखा प्रमुख प्रतिक्षा महराले प्रस्तुत गर्नुभएको थियो।
तालिमका प्रमुख प्रशिक्षक विष्णु केसी रहनुभएको थियो। तालिममा शाखाअन्तर्गतका ४५ वटा सक्रिय केन्द्रका सदस्यहरूको सहभागिता रहेको थियो। प्रशिक्षक केसीले बाख्रा तथा भैंसी पालनका व्यवहारिक पक्षहरू — सही खोर निर्माण, पोषण व्यवस्थापन, रोग पहिचान, उपचार विधि, खोप तालिका तथा बजार व्यवस्थापन — सम्बन्धी विस्तृत प्रशिक्षण दिनुभएको थियो।
त्यसैगरी प्रमुख अतिथिले सहभागीहरूलाई बचत, वित्तीय अनुशासन र दीर्घकालीन योजना बनाउनुपर्ने विषयमा सचेत गराउनुभएको थियो। अध्यक्ष राजु कवरले समूह मजबुतीकरण, जीवन बिमा तथा पशुपालनमार्फत आय वृद्धि गर्ने सम्भावनाबारे जानकारी गराउनुभयो।
कार्यक्रमको अन्त्यमा उत्कृष्ट कार्यसम्पादन गर्ने केन्द्रहरूलाई सम्मान समेत गरिएको थियो। सम्मानित केन्द्रहरूमा सफल ०३६ चुजा, ०२५ बुकीडाँडा, ०३४ जृमृकाडाँ, ०३७ खोलीगाउँ र ०२० चुन्दरी खोला परेका छन्। साथै विभिन्न विधाबाट ५ वटा केन्द्रलाई विशेष सम्मान प्रदान गरिएको छ।
